«Mediamall.am» լրատվականն ամփոփում է օրը.

Սամվել Կարապետյանին պատկանող առևտրի կենտրոններն «ականապատվել» են Ուկրաինայից

Օրեր առաջ ահազանգ էր ստացվել Ռուսաստանի 5 քաղաքներում (Մոսկվա, Սանկտ-Պետերբուրգ, Նիժնի Նովգորոդ, Ռեուտով, Կոլոմնա) «ՌԻՈ» սուպերմարկետների ցանցի 12 կետերում պայթուցիկ սարքեր տեղադրված լինելու մասին: Տարհանվել է շուրջ 12 հազար մարդ: Սուպերմարկետներում որևէ պայթուցիկ սարք չէր հայտնաբերվել: Իրավապահ մարմինների աղբյուրի փոխանցմամբ՝ նախնական տվյալներով, «հեռախոսային ահաբեկիչներն» առևտրի կենտրոններն «ականապատել են» Ուկրաինայից: Այս մասին հաղորդում է Fontanka.ru-ն:

Խարկովի հեռախոսային ահաբեկիչների Dillinger team խումբը «Տաշիր» ընկերությունների խմբի ղեկավար, գործարար Սամվել Կարապետյանին ֆինանսական պահանջներ է առաջադրել: Նրանից պահանջում են 23.8 հազար դոլարի համարժեք գումար, իսկ վճարելուց հրաժարվելու դեպքում ամեն շաբաթ մեկնարկային գինը կավելանա 4700 դոլարով:

ՆԳՆ մասնագետները փորձում են պարզել հեռախոսային ահաբեկիչների ինքնությունը: ՌԴ օրենսդրությամբ' նախապատրաստվող ահաբեչության մասին կեղծ հաղորդագրության համար սահմանված է խոշոր տուգանք կամ 3 տարվա ազատազրկում:

***

Եվգենի Բիբինին persona non grata ճանաչել Հայաստանում

Ազգային ժողովի ԲՀԿ խմբակցության պատգամավոր Տիգրան Ուրիխանյանը խորհրդարանին առաջարկում է «Հայաստանի էլեկտրական ցանցեր» ընկերության տնօրեն Եվգենի Բիբինին Հայաստանում անցանկալի անձ ճանաչել:

ԼՈՒՐԵՐ.com-ի թղթակցի փոխանցմամբ, Տիգրան Ուրիխանյանը հայտնեց, որ խոսելու է ոչ թե օրենքի նախագծի, այլ Հայաստանի Հանրապետության բոլոր քաղաքացիներին մտահոգող խնդրի՝ էլեկտրաէներգիայի թանկացման մասին:

«Ես մոտեցա ամբիոնին, որպեսզի հնչեցնեմ իմ և Հայաստանի քաղաքացիների մտահոգությունը էլեկտրաէներգիայի սակագնի բարձրացման վերաբերյալ: Այս պահին ես ցանկանում եմ առաջարկել Հայաստանի Հանրապետության խորհրդարանին, որպեսզի միջոցներ ձեռնարկվեն «Հայաստանի էլեկտրական ցանցեր»-ի տնօրեն Հայաստանում անցանկալի անձ՝ persona non grata ճանաչելու առումով՝ այն բանի համար, որ նա բացահայտ արհամարհել է Հայաստանի մի շարք պետական կառույցների, ինչպես նաև մեր երկրի բնակչությանը»,- նշեց Ուրիխանյանը :

Ուրիխանյանը իրավապահ մարմիններին հորդորեց նաև քրեական գործ հարուցել ՀԷՑ-ում տարիներ շարունակ տեղի ունեցած ապօրինությունների առթիվ:

ԱԺ փոխնախագահ Էդուարդ Շարմազանովը, արձագանքե;ով Ուրիխանյանի ելույթին, բոլոր պատգամավորներին հորդորեց խոսել քննարկվող օրենքի նախագծի վերաբերյալ: «Հարգելի պարոն Ուրիխանյան, ես հասկանում եմ, որ հայտարարությունների ժամ չկա արտահերթ նստաշրջանի ընթացքում, սակայն եկեք խոսենք բացառապես քննարկվող նախագծերի վերաբերյալ: Ես հասկանում եմ, որ խնդիրը, որի մասին Դուք ցանկանում եք խոսել, շատ կարևոր է, և, պատգամավորական համերաշխությունից ելնելով, ես չանջատեցի Ձեր խոսափողը: Բայց խնդրում եմ պահպանել կանոնակարգ-օրենքը»,- ասաց Շարմազանովը:

***

Դերասանուհի Լուիզա Ղամբարյանը վթարի է ենթարկվել

Այսօր' հունիսի 18-ին, ավտովթար է տեղի ունեցել Երևանում: Ինչպես հայտնում է shamshyan.com-ը՝ ժամը 18:10-ի սահմաններում Աթոյան և էրեբունի 15-րդ փողոցների խաչմերուկում բախվել են Երևանի բնակիչ, 38-ամյա Լուիզա Համբարյանի վարած Kia Sportage մակնիշի 30 SO 504 համարանշի և 32-ամյա Արթուր Առաքելյանի վարած Opel Astra մակնիշի 34 CS 334 համարանիշի ավտոմեքենաները:

Վթարի հետևանքով Opel-ի ուղևորը մարմնական վնասվածքներով տեղափոխվել է հիվանդանոց:
Մանրամասն՝ սկզբնաղբյուր կայքում: