Այսօր Ազգային ժողովում Կառավարության հարցուպատասխանի ժամանակ ՀՀ ՊՆ Վիգեն Սարգսյանն, անդրադառնալով վերջերս մեծ աղմուկ բարձրացրած Վրաստանում տեղի ունեցած ՆԱՏՕ-ի Agile spirit 2017 զորավարժություններին Հայաստանի բացակայությանը, նշեց. «Մեր Զինված ուժերը երկար տարիներ մասնակցում են երկկողմ, բազմակողմ տարբեր միջոցառումների։ Մենք տարեկան մասնակցում ենք հարյուրավոր միջոցառումների և չենք մասնակցում տարեկան հազարավոր միջոցառումների: Ինչ վերաբերում է կոնկրետ ՆԱՏՕ-ի Agile spirit 2017 զորավարժությանը, ապա ի սկզբանե Հայաստանը այդ միջոցառմանը մասնակցելու որոշում չի ունեցել»։ Նախարարի խոսքով՝ դեռևս մարտ ամսին հայկական կողմը պաշտոնապես տեղեկացրել է գործընկերներին, որ այդ զորավարժությանը չի մասնակցելու՝ ելնելով այդ զորավարժության կամ ՆԱՏՕ-ի հետ մեր խնդիրների չհամընկնելու ուղիղ մեր օրակարգային հարցերին չանդրադառնալու առումով։ «Հարցի շուրջ առաջացած աղմուկի պատճառներից մեկը թերևս Պաշտպանության նախարարության կողմից արագ չարձագանքելն է եղել և դա կապում եմ նրա հետ, որ ես և նախարարության տեղեկատվության վարչության պետը ճանապարհվել էինք ՉԻնաստան, իսկ մամուլի քարտուղարը, կարծում եմ, որ այդ պահին լիարժեք չի պատասխանել, որի համար նրան արել եմ դիտողություն»,-հայտարարեց նախարարը: