Ռուսաստանի Դաշնության Մագնիտոգորսկ քաղաքում պայթյունի հետևանքով փլուզված բնակելի շենքի փլատակների տակից դուրս բերված 10 ամսական երեխայի վիճակը գնահատվում է կայուն, նա սկսել է ինքնուրույն շնչել, հաղորդում է РИА Новости-ն՝ ՌԴ առողջապահության նախարարությանը հղումով:
«10 ամսական Վանյա Ֆոկինը չորրորդ օրն անընդմեջ գտնվում է Մոսկվայի անհետաձգելի մանկական վիրաբուժության և վնասվածքաբանության գիտահետազոտական ինստիտուտի մասնագետների հսկողության տակ: Բժիշկների գնահատմամբ՝ երեխայի վիճակը կայուն է: Վերջին 24 ժամվա ընթացքում երեխան սկսել է ինքնուրույն շնչել: Բժիշկները շարունակում են շուրջօրյա վերահսկողության տակ պահել երեխայի վիճակը»,- ասվում է հաղորդագրության մեջ:
Երեխան փլատակների տակից դուրս էր բերվել հունվարի 1-ին և ծանր վիճակում տեղափոխվել Մոսկվա:
Հիշեցնենք, որ միջադեպը տեղի է ունեցել դեկտեմբերի 31-ին: Գազի պայթյունի հետևանքով փլուզվել է 10-հարկանի շենքի մուտքերից մեկը: Փլուզման գոտում 120 մարդ է բնակվել: Ողբերգության հետևանքով մահացել է 39 մարդ:
