«Սիրելիներ, ՀՀ Պետական եկամուտների կոմիտեի ոչ առևտրային կազմակերպությունների հսկողության բաժնի պետ Արման Ղազարյանը փնտրում է «Հայ Առաքելական եկեղեցու Շիրակի թեմ»-ի տնօրեն պարոն Գևորգ Աջսպահյանին, ով բնակվում է Շիրակի մարզի Գյումրի քաղաքի Մայիսյան ապստամբ. 1 հասցեում։ Հայցում եմ ձեր օգնությունը՝ գտնելու սույն մարդուն»,- այս մասին իր ֆեյսբուքյան էջում գրել է Հայ Առաքելական եկեղեցու Շիրակի թեմի առաջնորդ Միքայել եպիսկոպոս Աջապահյանը՝ նշելով, որ Պետական եկամուտների կոմիտեից անհասկանալի ձևակերպումներով գրություն է ստացել։
 
Աջապահյանը հրապարակել է նաև փաստաթուղթը, ըստ որի՝ ՊԵԿ պաշտոնյան զգուշացնում է, որ նա պարտավոր է ՊԵԿ-ի պահանջով ողջամիտ ժամկետում տրամադրի իր կառավարման մարմինների որոշումների պատճենները կամ գործունեության մասին այլ փաստաթղթեր:
 

ԼՈՒՐԵՐ.com-ի հետ զրույցում Հայ Առաքելական եկեղեցու Շիրակի թեմի առաջնորդ Միքայել եպիսկոպոս Աջապահյանը նախ տգիտություն որակեց ՊԵԿ-ից ստացած նամակը: Նրան վրդովվեցրել է այն, որ պետական կառույցը չի տիրապետում ամենապարզ բաների. «Ստացած նամակում ազգանունս տառասխալով է գրված (Աջսպահյան), հետո ես վաղուց Գևորգը չեմ. 31 տարի է իր ավազանի անունը փոխված է, ինչպես նաև Հայ Առաքելական եկեղեցին ոչ թե տնօրեն է ունենում, այլ՝ ունի առաջնորդ: Իսկ Մայիսյան Ապստամբության 1 հասցե 30 տարի է Գյումրիում գոյություն չունի»,- ասաց սրբազանը։

Աջապահյանի խոսքով՝ ուղարկված նամակից ոչինչ չի հասկացել և ցանկությունն էլ չունի խորանալու անգրագետ բովանդակության մեջ. «Հայ Առաքելական եկեղեցու Շիրակի թեմը հասարակական կազմակերպություն չէ և ոչ էլ իրավաբանական անձ: Իրավաբանական անձ է հանդիսանում է Մայր Աթոռ Սուրբ Էջմիածինը։ Ո՞նց կարող է պետական կառույցում նման տգիտություն լինել»,- իր վրդովմունքը հայտնեց նա։

Մենք փորձեցինք նաև մեկնաբանություն ստանալ ՊԵԿ-ից, սակայն այստեղից փոխանցեցին, որ քիչ հետո հաղորդագրություն կներկայացնեն և կտրուկ հրաժարվեցին մեր հարցին պատասխանել: Հավանաբար ՊԵԿ-ում չեմ կողմնորոշվել դեռևս, թե ինչպես պետք է պատասխանեն Աջապահյանի մատնանշած տգիտությանը: