Այսօր տեղեկություններ էին տարածվել, որ Երևանի Ալեքսանդր Պուշկինի անվան թիվ 8 հիմնական դպրոցում A H1N1-ի դեպքեր են գրանցվել, աշակերտների մի մասը չի գնացել դպրոց։ Նշենք, որ A H1N1-ն առավել հայտնի է «խոզի գրիպ» անունով։
Դպրոցի տնօրեն Նատալյա Ստեփանյանը հայտնել էր, որ գրիպի հաստատված դեպքերի թիվը 10-ից ավել է, պարզապես դեռ ոչ բոլոր ծնողներն են տեղեկանքներ բերել դպրոց: Նա հայտնել էր, որ դեպքերի մեծ մասը գրանցվել է 3-րդ, 4-րդ և 9-ոդ դասարաններում:
Տեղեկություններին արձագանքել են նաև Առողջապահության և Կրթության, գիտության, մշակույթի և սպորտի նախարարները։ ԿԳՄՍ նախարար Արայիկ Հարությունյանն իր ֆեյսբուքյան էջում գրել է․ «Այս օրերի ընթացքում մենք ստանում ենք հաղորդագրություններ, որոնցում մեր քաղաքացիներն անհանգստություն են հայտնում ուսումնական հաստատություններում, հատկապես՝ դպրոցներում, հնարավոր համաճարակների բռնկման վերաբերյալ:
Ամենօրյա կապ պահելով առողջապահության նախարար Արսեն Թորոսյանի հետ՝ արձանագրել եմ, որ համաճարակային ֆոնի կտրուկ փոփոխություններ չեն նկատվել: Ես այսօր անձամբ եմ եղել երկու դպրոցում, ուր, այո, եղել են դասարաններ ցածր հաճախելիությամբ, սակայն եղել են դասարաններ, ընդ որում՝ մեծամասամբ, որտեղ բացակայությունները չեն գերազանցել 10 տոկոսը:
Երեկ նամակով դիմել եմ նաև Տարածքային կառավարման և ենթակառուցվածքների նախարար Սուրեն Պապիկյանին՝ խնդրելով լրացուցիչ միջոցներ ձեռնարկել առաջիկա ցուրտ օրերին դպրոցներում ջերմային պատշաճ ռեժիմ ապահովելու համար:
Մենք մշտապես կապ ենք պահում առողջապահական գերատեսչության հետ, և համաճարակային ֆոնի փոփոխության դեպքում լրացուցիչ կհաղորդենք, իսկ անհրաժեշտության դեպքում՝ կձեռնարկենք միջոցներ:
Ստորև՝ Արսեն Թորոսյանի գրառումն է այս թեմայով»,- գրել է նախարարը:
