Պաշտպանության բանակը պարգևատրման է ներկայացրել Արցախի դեմ Ադրբեջանի սանձազերծած պատերազմում խիզախությամբ և հերոսական արարքներով աչքի ընկած մի խումբ զինծառայողների:
Այս մասին հայտնեցին Արցախի Հանրապետության պաշտպանության նախարարությունից:
Պաշտպանության բանակի տարածած հաղորդագրության մեջ նշվում է, որ մայոր Արամո Եգանյանը, ավագ լեյտենանտ Մերսիկ Բաղդասարյանն ու շարքային –պայմանագրային Կարեն Ապրեսյանը ներկայացվել են «Արիության համար» մեդալների՝ հաշվարկի կազմով թշնամական 2 ինքնաթիռ խոցելու համար:
Ռաֆիկ Օրդոյանը «Մարտական ծառայություն» մեդալով կպարգևատրվի հակառակորդի 3 ԱԹՍ ոչնչացնելու համար: Նույն կարգի մեդալների են ներկայացվել նաև մայոր Արմեն Բախյանը, ավագ լեյտենանտ Գագիկ Ամիրխանյանը, ավագ լեյտենանտ Թաթուլ Բաբայանը, կրտսեր սերժանտ-պայմանագրային Նարեկ Ալավերդյանը մարտական բարդ իրավիճակներում արագ կողմնորոշվելու և հակառակորդ 4 ԱԹՍ շարքից հանելու համար:
«Իսկական հերոսին վայել արդյունք է գրանցել հակատանկային մարտկոցի հրամանատար, կապիտան Արսեն Գաբրիելյանը, ով կարողացել է գերազանց մասնագիտական գիտելիքների, կամային բարձր որակների և սառնասրտության շնորհիվ շարքից հանել թշնամական 12 տանկ և մեր ուժերի օգտին վճռել մարտական մի շարք դրվագների ելքը»,- նշված է հաղորդագրության մեջ:
