Լեհաստանում ԱՄՆ Կենտրոնական հետախուզական վարչության (ԿՀՎ) գաղտնի բանտերի գործով ի հայտ է եկել նոր անձ՝ ծծագումով եմենցի Վալիդ Մուհամմեդ բեն Աթթաշը: «Amnesty International»-ի հրավիրած կոնֆերանսում նրա փաստաբան Մարիուշ Պապլյարչիկը հաղորդել է, որ ինքը Կրակովի վերաքննիչ դատարան է փոխանցել իր պաշտպանյալին տուժողի կարգավիճակ ունեցող անձ ճանաչելու մասին դիմում: Փաստաբանը պատմել է, որ եմենցուն 10 տարի առաջ գերի են վերցրել Պակիստանում, իսկ հետո, 2003թ. հունիսից սեպտեմբեր ժամանակահատվածում նրան պահել են Լեհաստանում, ապա՝ տեղափոխել Ռումինիա:

«vesti.ru»-ն հաղորդում է, որ ԿՀՎ-ի գաղտնի բանտերի մասին գործը,որը պայմանականորեն կոչվում է «լեհական գործ» սկսվել է 2008թ.-ից: Այդ ժամանակից տուժողներ են ճանաչվել երկու մարդ՝ Սաուդյան Արաբիայի քաղաքացի Աբդել Ռահիմ ան-Նաշիրին և պաղեստինցի Աբու Զուբեյդան: Նրանք պնդում են, որ 2002թ.-ին ամերիկյան հատուկ ծառայությունները իրենց հասցրել են Լեհաստան, պահել բանտում և խոշտանգել:

Իսկ «ԻՏԱՐ-ՏԱՍՍ»-ը հաղորդում է, որ Եվրոպայում ամերիկյան գաղտնի ծառայությունների բանտերի գոյության մասին հայտնի է դարձել 2005թ.-ին «Washington Post» թերթում լույս տեսած հոդվածի շնորհիվ:

Դրանից հետո «Human Rights Watch» կազմակերպության իրավապաշտպանները հաղորդել են, որ այդպիսի բանտեր եղել են Ռումինիայում, Լեհաստանում և Լիտվայում: Լրատվական գործակալությունը նշել է, որ դրանցից մեկը գտնվել է Ստարի Կեյկուտի հետախուզական դպրոցի տարածքում, Շիմանախ ռազմական օդանավակայանից 20 կմ հեռու: