www.azatutyun.am Հայաստանը չի կարող միաժամանակ անդամակցել Պուտինի առաջարկած Մաքսային միությանն ու ԵՄ Ասոցիացման համաձայնագրին. այդ մասին «Ազատություն» ռադիոկայանին տված բացառիկ հարցազրույցում հայտարարել է Եվրախորհրդարանի արտաքին հարաբերությունների հանձնաժողովի նախագահ Էլմար Բրոկը, ով նաև Եվրոպայի ամենահզոր քաղաքական ուժի' Եվրոպական ժողովրդական կուսակցության գործադիր մարմնի անդամ է:
«Ես շատ եմ ցավում այդ որոշման համար, քննարկել եմ այս հարցը Հայաստանի նախագահի հետ: Մենք գիտենք, որ Հայաստանի վրա ահռելի ճնշումներ են գործադրվել Ռուսաստանի կողմից' Ադրբեջանի և Ղարաբաղի շուրջ դժվար իրադրության հետ կապված, և որ այդ ճնշումները օգտագործվել են Հայաստանի նման փոքր պետությանը շանտաժի ենթարկելու համար, որպեսզի նման որոշում կայացվի: Ես շատ եմ ցավում, քանի որ իրավաբանորեն և որոշ այլ պայմանների պատճառով հնարավոր չէ լիարժեք անդամակցել և՛ Մաքսային միությանը, և՛ ԵՄ Ասոցիացման համաձայնագրին և Խորը և համապարփակ ազատ առևտրի գոտուն», - ասել է եվրոպացի բարձրաստիճան պաշտոնյան:
«Ազատություն» ռադիոկայանը հետաքրքրվել է նաև, թե ինչպիսին կլինեն Հայաստան - Եվրամիություն հարաբերությունները այսուհետ' նախագահ Սերժ Սարգսյանի վերջին հայտարարություններից ու Պուտինի նախաձեռնած Մաքսային միությանը միանալու որոշումից հետո:
«Մեր հարաբերությունները կլինեն այնպիսին, ինչպիսին որ Եվրամիությունը ունի ցանկացած այլ երկրի հետ, բայց' առանց եվրոպական հեռանկարի», - պատասխանել է Եվրախորհրդարանի արտաքին հարաբերությունների հանձնաժողովի նախագահը: Ընդ որում, Էլմար Բրոկը չի համաձայնել որոշ փորձագետների տեսակետին, թե պաշտոնական Երևանը ստիպված էր նման որոշում կայացնել, քանի որ Եվրամիությունը «դժվարին պահին միայնակ թողեց Հայաստանին»:
«Կարծում եմ' այդ պնդումները ընդամենը քարոզչական տարր են' նախատեսված ներքին լսարանի համար: Մենք պատրաստ էինք բանակցել համաձայնագրի շուրջ և առաջընթաց արձանագրել այս ուղղությամբ Վիլնյուսում, դա շատ հստակ էր: Կարծում եմ' պատճառը դա չէ: Պատճառը շանտաժն ու ճնշումներն էին, որ գործադրվեցին Ռուսաստանի կողմից», - նշել է նա:
«Ի՞նչ եք կարծում, հնարավորություն կա՞, որ Հայաստանը փոխի իր միտքը' Վիլնյուսյան գագաթնաժողովից առաջ»' հետաքրքրվել է Բրյուսելում աշխատող «Ազատություն» ռադիոկայանի թղթակիցը:
«Հուսով եմ, քանի որ մենք դեռ խոսելու ենք հայկական կողմի հետ»,- ասել է եվրոպացի պաշտոնյան' մանրամասնելով. - «Վերջին տարիների ընթացքում ես մի քանի անգամ քննարկում եմ ունեցել Հայաստանի նախագահի հետ, և հիմա կարող եմ միայն ենթադրել, որ այստեղ ռուսական կողմի ճնշումն է դեր խաղացել: Եթե հնարավորություն լինի վերադառնալ այս հարցին, ապա շատ կարևոր է, որ ղարաբաղյան խնդիրը կարգավորված լինի, և Հայաստանի նման փոքր պետությունը լուծման տարբերակ գտնի Ադրբեջանի հետ' տարածաշրջանի խնդիրները հաղթահարելու համար: Եվրամիությունը, որը մինչ օրս դրանով չի զբաղվել, պետք է շատ ավելի մեծ հետաքրքրություն դրսևորի այս սառեցված հակամարտությունը կարգավորելու հարցում»:
Հարցազրույցի ավարտին Եվրախորհրդարանի ազդեցիկ պաշտոնյան ևս մեկ անգամ բացառել է հնարավորությունը, որ Հայաստանը կարող է միաժամանակ անդամակցել և՛ Կրեմլի առաջարկած միությանը, և՛ ԵՄ Ասոցիացված համաձայնագրին ու ազատ առևտրի գոտուն:
«Դրանց միջև կան իրավաբանական հակասություններ, հնարավոր չէ կիսով չափ հղի լինել», - եզրափակել է Եվրամիության ամենահզոր քաղաքական ուժի' Եվրոպական ժողովրդական կուսակցության տնօրենների խորհրդի անդամ Էլմար Բրոկը:
Ռիկարդ Յոզվիակ և Հեղինե Բունիաթյան
