Լրագրողների հետ հանդիպման ժամանակ Հանրային խորհրդի նախագահ Վազգեն Մանուկյանը լրագրողների խնդրանքով անդրադարձավ նաև առաջիկա նախագահական ընտրություններին:
Ինչո՞ւ Լևոն Տեր-Պետրոսյանը չառաջադրվեց հարցին Վազգեն Մանուկյանը պատասխանեց. «Նախ ոչ միայն Լևոն Տեր-Պետրոսյանը չի դրել իր թեկնածությունը, այլ 2,5 միլիոն մարդ չի դրել և ամեն մեկի պատճառները գտնել, թե ինչու չեն դրել, մի կողմ թողնենք: Ինձ համար Լևոն Տեր-Պետրոսյանը մի նախադասություն է ասել' չի դնելու և վերջ, մնացածի մասին խոսելն անիմաստ է»:
Վազգեն Մանուկյանի խոսքով' 95-96 թվականների պես բարենպաստ պայմաններ' երկիրն առաջ տանելու, նորմալ ընտրություններ կազմակերպելու, Հայաստանը չի ունեցել և չի ունենա. «Այն ժամանակվա իշխանությունը' հենց Լևոն Տեր Պետրոսյանով, վիժեցրեց այդ հնարավորությունը, մենք մտանք մի ուրիշ սցենարի մեջ և այժմ շարժվում ենք այդ սցենարով»:
Ինչ վերաբերում է այս ընտրություններին, ապա տարբերությունն այն է, որ այլընտրանք չկա. «Օրինակ, 96 թվին հասկանալի էր, որ եթե ոչ Լևոնը, ապա Վազգեն Մանուկյանը, 98-ին' Կարեն Դեմիրճյանը, 2003-ին ժողովուրդը երկու մարդու էր տեսնում' Ստեփան Դեմիրճյանին և Արտաշես Գեղամյանին, վերջին ընտրություններում' ժողովրդի մի հատված կար, որ ինչքան էլ զարմանալի է' Լևոն Տեր-Պետրոսյանին էր տեսնում, մի մասն էլ' Արթուր Բաղդասարյանի մեջ: Հիմա կա՞ մի մարդ, որին ժողովուրդը Սերժ Սարգսյանի փոխարեն ուզում է տեսնել: Ես չեմ տեսնում այդպիսի թեկնածու»:
Այս իրավիճակի համար նա մեղադրում է նախ և առաջ նախորդ իշխանություններին, ապա ընդդիմությանը. «Ո՞ւմ էր տեսնում ընդդիմությունը միասնական թեկնածու, ասե´ք, ու՞մ էին ուզում առաջ բրթել, եկեք քննարկենք: Ո՞վ էր էդ Սասունցի Դավիթը, որ պետք է փրկեր Հայաստանին, ըստ ընդդիմության: Ասեք' իմանանք»,- առաջարկեց Մանուկյանը:
«Ծառուկյան Գագոն»,- ասաց լրագրողներից մեկը:
«Ծառուկյան Գագո՞ն…բայց ամբողջ ժամանակաշրջանում ընդդիմությունը պայքարում էր օլիգարխների դեմ, երկիրը թալանողների դեմ, Ծառուկյան Գագիկի դեմ: Էդ ո՞նց դառավ Ծառուկյան Գագիկն էս երկրի փրկիչը»,- տարակուսեց Մանուկյանը,- եթե ընդդիմությունն այդքան ցինիզմի է հասցնում իր պրագմատիզմը, էլ ի՞նչ եք ուզում, որ այդ երկրում տեղի ունենա: Պիտի տեղի ունենա էն, ինչ որ տեղի է ունենում»: