Երևանի քաղաքապետարանի մոտ այսօր ակցիա և բացօթյա ասուլիս անցկացրեցին Կոմիտաս 5 հասցեի հարակից շենքերի բնակիչները, որոնք պայքարում են այս հասցեում իրականացվող շինարարության դեմ: Նրանք նշեցին, որ այլևս անիմաստ են համարում Կոմիտաս 5 հասցեում ակցիա անելը, քանի որ ոստիկանները թույլ չեն տալիս շինհրապարակին մոտենալ, խոչընդոտում են իրենց ազատ տեղաշարժը:
Կոմիտաս 5 հասցեում իրականացվող շինարարության դեմ տարածքի մի քանի շենքերի բնակիչներն արդեն 4 տարի է պայքարում են: Այս հասցեում գտնվող մի քանի բնակելի շենքերի հենց մեջտեղում, այնտեղ, որտեղ պետք է բնակիչների համար հանգստի գոտի լիներ, նոր բազմաբնակարան շենք է կառուցվում: Շինարարությունն իրականացնում է «Լիբեր» ՍՊԸ-ն, որի տնօրենը իրանահայ Էդվարդ Քեշիշ Աբրահամն է: Բնակիչներն այսօր ասացին, որ հարց են ուղղում Սերժ Սարգսյանին՝ ինչո՞ւ է նա անտեսում մոտ 100 ընտանիքների իրավունքներն ու վեր դասում մեկ անձի շահը: Բնակիչներից Մուշեղ Սուվարյանն ասաց, որ ձայնագրություն ունի այն մասին, թե ինչպես է Քեշիշ Աբարահամն ասել, որ թքած ունի Հայաստանի հողի վրա:
«Այստեղ տեղ են տալիս այն մարդկանց, ովքեր սրտացավ չեն երկրի համար, թքած ունեն մեր հողի վրա: Նախագահ, ո՞ւր ա մեր Սահմանադրությունը, մի բիզնեսմեն գալիս ու թքում ա մեր հողի ու ջրի վրա, իսկ դու նրա հետ նստում հարցեր ես քննարկում»,- ասում էին բնակիչները:
Պայքարի արդյունքում բնակիչներին քաղաքապետարանից իրազեկել են, որ նախկին 14 հարկանի կառույցի փոխարեն այստեղ 7 հարկանի շենք է կառուցվելու: Սակայն դա չի վերացրել մարդկանց մտահոգությունները: «Մենք արդեն մոտ մեկ շաբաթից ավելի է, դիմել ենք արտակարգ իրավիճակների նախարարություն՝ խնդրելով, որ գան ֆիքսեն մեր շենքին հասցված վնասները: Պատերին առաջացել են ճաքեր, որոնք օրեցօր խորանում են: Խնդրել ենք, որպեսզի էլեկտրամագնիսական դաշտի առկայությունը ստուգեն մեր բնկարաններում, ոչ մի արձագանք չկա: Մեր շենքը 66 թվականի կառույց է, համարվում է մեծ մաշվածություն ունեցող շենք, բնական է, որ հնարավոր չէր, որ այդ շինարարությունը որևէ ազդեցություն չունենար: Շենքի հիմքերն արդեն խարխլվել են: Անգամ անձամբ խնդրանքով դիմել ենք թաղապետին, որ ինչ-որ միջոցներ ձեռք առնվեն: Իրենց հետաքրքիր չէ, թե ժողովուրդն ինչ վիճակում է ապրում, ինչ վնասներ է կրում»,- ասաց Կոմիտաս 5Ա շենքի բնակիչներից Սուսաննա Թերզյանը:
Բնակիչներին վերջին անգամ կառուցապատողն ասել է, որ միևնույն է շինարարությունը կատարվելու է, քանի որ զրո նիշի թույլտվություն ունեն:
Բնակիչներին այսօր միացել էր նաև Երևանի ավագանու Բարև Երևան խմբակցության անդամ Արմեն Մարտիրոսյանը, ով ասաց, որ շինարարություն այնպիսի փուլում է գտնվում, որ հնարավոր է շտկել իրավիճակը: Արմեն Մարտիրոսյանը նշեց, որ այսօր Երևանում մանկապարտեզների խնդիր կա, թող այդ վայրում ցածրահարկ մանկապարտեզ կառուցեն, բնակիչներին էլ չեն զրկի արևի լույսից: «Իշխանությունը պետք է վերջապես ընդունի այն պարզ ճշմարտությունը, որ իրենք քաղաքացիների համար են աշխատում, և ոչ թե քաղաքացիներն են իրենց համար աշխատում»,- ասաց Մարտիրոսյանը:
Բնակիչները քաղաքապետարանի Մեկ պատուհան ծառայությունում հանդիպում էին պահանջել քաղաքապետի կամ Երևանի գլխավոր ճարտարապետի հետ: Քիչ անց նրանց մոտեցավ քաղաքապետարանի աշխատակից Արբակ Վարդանյանը, ով բնակիչներին հրավիրեց քաղաքապետարան քննարկման: Լրատվամիջոցների մուտքն արգելվեց:
