mediamall.am-ն առանձնացրել է օրվա կարևոր նորությունները
«Կուտակային կենսաթոշակների մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու հարցը դրվեց քվերակության և ընդունվեց 67 կողմ ձայնով' չգրանցելով դեմ կամ ձեռնպահ:
ՀՅԴ խմբակցության քարտուղար Աղվան Վարդանյանը ձայնի իրավունք խնդրեց ու հայտնեց. «Մենք խնդրում և պահանջում ենք' հարգել ու պաշտպանել օրենքը' թույլ չտալով, որ ԱԺ պատգամավորը բացակա պատգամավորի փոխարեն քվեարկի»,- ասաց նա: Այս ամենին ի պատասխան' Գալուստ Սահակյանը նշեց. «Հենց այդպես էլ անում ենք»:
ՀՅԴ խմբակցության պատգամավոր Արծվիկ Մինասյանը վարման կարգով ձայնի իրավունք խնդրեց ու հայտնեց, որ իրենց խմբակցությունը չմասնակցեց քվեարկությանը, որը, նրա խոսքով, օրենքով նախատեսված դիրքորոշում է:
ՀՀԿ խմբակցության ղեկավար Վահրամ Բաղդասարյանն էլ առաջարկեց դաշնակցական իր գործընկերներին հաշվետարի դեր կատարել: «Հաշվեք պատգամավորների քանակը, չի կարելի նման տիպի ավանտյուրաներով, շանտաժներով հանրությանը դնել թյուրիմացության մեջ»,-ասաց նա:
Վարման կարգի շրջանակներում ձայն խնդրելով' ՀԱԿ խմբակցության ղեկավար Լևոն Զուրաբյանը, ԲՀԿ-ական Վարդան Օսկանյանն ու ՕԵԿ խմբակցության ղեկավար Հեղինե Բիշարյանը խնդրեցին 20 րոպե ընդմիջում, խնդրանքը, սակայն, ԱԺ նախագահը չընդունեց' նշելով, որ մեծ աշխատանք պետք է իրականացնի Ազգային ժողովը:
Գալուստ Սահակյանը տեղեկացրեց, որ իրենք ստորագրահավաք են իրականացրել, որպեսզի կարողանան 18:00-ից հետո անցկացնել արտահերթ նիստ, որպեսզի բոլոր հարցերը հասցնեն այսօր քննարկել:
Կառավարության նախաձեռնությամբ եւ հրատապ օրինագծերի քննարկման նպատակով հրավիրված' Ազգային ժողովի արտահերթ նստաշրջանի չորրորդ օրվա աշխատանքը մեկնարկեց 108 պատգամավորի գրանցմամբ, որին հաջորդեց 20 րոպե ընդմիջում:
***
«Կուտակային կենսաթոշակների մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու հարցը դրվեց քվեարկության և ընդունվեց 67 կողմ ձայնով' չգրանցելով դեմ կամ ձեռնպահ:
Հիմնական զեկուցող, ՀՀ աշխատանքի ու սոցիալական հարցերի նախարար Արտեմ Ասատրյանը քվեարկությունից առաջ պատգամավորներին տեղեկացրեց, որ օրենսդրական փաթեթում որոշակի խմբագրական փոփոխություններ են արվել' հաշվի առնելով առաջին ընթերցման ժամանակ պատգամավորների կողմից արված առաջարկությունները:
Օրենսդրական փաթեթը երկրորդ ու երրորդ ընթեցմամբ նախատեսվում է ընդունել այսօրվա արտահերթ նիստի ժամանակ:
Օրենսդիրը հունիսի 20-ին ավարտել է «Կուտակային կենսաթոշակների մասին» եւ մի շարք այլ օրենքներում փոփոխություններ ու լրացումներ առաջարկող օրինագծերի փաթեթի քննարկումը: Արծվիկ Մինասյանը ՀՅԴ խմբակցության համար անընդունելի համարեց քննարկվող օրինագծերի փաթեթը, որի վերաբերյալ չեն եղել հանրային քննարկումներ:
Մհեր Շահգելդյանի գնահատմամբ՝ ՕԵԿ խմբակցության համար անընդունելի է քննարկվող օրինագծերի փաթեթը, քանի որ չի հանվել պարտադիր կուտակային բաղադրիչը:
ՀԱԿ խմբակցության ղեկավար Լեւոն Զուրաբյանը նկատեց, որ պարտադիր կուտակային բաղադրիչը պարզապես դարձել է նպատակային սոցիալական վճար, ինչը, ըստ էության, ոչինչ չի փոխում:
ԲՀԿ անդամ Միքայել Մելքումյանի գնահատմամբ՝ այս փաթեթի ընդունման համար պատեհ պահ չի ընտրված: «Հանդուրժողական մթնոլորտում պետք է մասնագիտական վերլուծությունը համադրել քաղաքական որոշումների հետ և գտնել արդյունավետ լուծում»,- նշեց Մելքումյանը: Նա տեղեկացրեց, որ ԲՀԿ-ն դեմ է այս տեսքով բարեփոխման իրականացմանը:
«Ժառանգություն» խմբակցության ղեկավար Ռուբիկ Հակոբյանը դեմ արտահայտվեց օրինագծերի փաթեթին և նշեց, որ հարցի վերաբերյալ հանրային միասնական քննարկում չի եղել:
ՀՀԿ խմբակցության ղեկավար Վահրամ Բաղդասարյանը հիմնավորեց քննարկվող հարցի սահմանադրականությունը և ներկայացրեց պետական ու մասնավոր հատվածների աշխատողների նկատմամբ կիրառվող տարբեր մոտեցումների պատճառները: Նախատեսվում է, որ փաթեթը քվեարկության կդրվի այսօրվա նիստում:
ՀՀ վարչապետ Հովիկ Աբրահամյանի առաջարկով' մի շարք օրենքների նախագծեր հանվել են ԱԺ արտահերթ նստաշրջանի օրակարգից:
***
Ազգային ժողովը 20 րոպե ընդդիջման գնաց ՀԱԿ խմբակցության ղեկավար Լևոն Զուրաբյանի առաջարկությամբ: Մասնավորպես, Լևոն Զուրաբյանը նշեց. «Ես պահանջում եմ 20 րոպե ընդմիջում' ըստ օրակարգի»,- որին ի պատասխան' Գալուստ Սահակյանը ավելացրեց. «Դուք փորձում եք խոտանել, ձախողել ԱԺ աշխատանքը, ես ապահովում եմ բնականոն աշխատանքը: 20 րոպե ընդմիջում»:
Մինչ այդ ԱԺ նախագահ Գալուստ Սահակյանը քվեարկության դրեց «Կուտակային կենսաթոշակների մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթն առաջին ընթաերցմամբ ընդունելու հարցը: «Ձեր առաջարկների հիման վրա փոփոխություններ են կատարվել, ձայնը տալիս եմ զեկուցողին' պարոն Ասատրյանին»,- ասաց ԱԺ նախագահը:
Զեկուցող, ՀՀ աշխատանքի և սոցիալական հարցերի նախարար Արտեմ Ասատրյանը ԱԺ հարթակից ներկայացրեց, որ կատարվել են խմբագրական փոփոխություններ պատգամավորների առաջարկությունների հիման վրա:
«Առաջին ընթերցմանը ներկայացված փաթեթի քննարկման ընթացքում հնչած առաջարկությունները, որոնք հիմնականում վերաբերում էին խմբագրական խնդիրներին, այս ընթացքում վերամշակել ենք, որպեսզի վերացնենք թյուրընբռնումները ու տարընթերցումները: Հստակեցվել է պարտադիր կենսաթոշակային ֆոնդ արտահայտությունը' պարոն Մանուկյանի առաջարկության շրջանակներում»,- ասաց նա: Բացի այդ' առաջարկվում է մի շարք օրենքներից հանել «պարտադիր» բառը կամ «պարտադիր կուտակային» բառը փոխարինել «կուտակային» բառով:
«Ընդունվել է նաև առաջարկությունը, որ խնամքի արձակուրդում գտնվող անձին բացի նրանից, որ պետությունը 5000 դրամ փոխանցի, նաև գործատուն փոխհատուցի 3000 դրամի չափով»,- նշեց Արտեմ Ասատրյանը:
Կառավարության նախաձեռնությամբ եւ հրատապ օրինագծերի քննարկման նպատակով հրավիրված Ազգային ժողովի արտահերթ նստաշրջանի չորրորդ օրվա աշխատանքը սկսվեց 108 պատգամավորի գրանցմամբ:
***
Ազգային ժողովի փոխխոսնակ Էդուարդ Շարմազանովը հերթական հայտարարությունն արեց' անդրադառնալով ՀԱԿ խմբակցության պատգամավորի այն հայտարարությանը, որ իրենց չի տրվել 20 րոպե ընդմիջում:
««Կուտակայինն» անվավեր են համարում, քանի որ 20 րոպե ընդիմջում չենք տվել ու մեզ մեղադրում են դրանում: Ես պաշտոնապես հայտարարում եմ, որ «Կուտակային կենսաթոշակների մասին» օրենքը քվեարկվել է ոչ իշխանական ուժերի կողմից խնդրած 20 րոպե ընդմիջումից հետո: Նույն հարցի վերաբերյալ մեկ անգամից ավելի ընդմիջում չի կարելի վերցնել: Ուստի, մեկ անգամ ևս վերահաստատում եմ, որ ինչպես Մուրադ Մուրադյանի ու Արման Սահակյանի դեպքում, չի եղել քվերակություն, այնպես էլ այս երկրորդ մեղադրանքը, թե մենք իբր 20 րոպե ընդմիջում չենք տվել, սուտ է, քանի որ տրվել է ընդմիջում, որից անմիջապես հետո քվերակություն է եղել»,-ասաց Էդուարդ Շարմազանովը:
«Կուտակային կենսաթոշակների մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու հարցը դրվեց քվերակության և ընդունվեց 67 կողմ ձայնով' չգրանցելով դեմ կամ ձեռնպահ:
Քառյակը բոյկոտեց քվեարկությունը, որից հետո քննարկում անցկացրեց ու համատեղ մամուլի ասուլիսի ժամանակ հայտարարեց, որ այդ քվեարկությունն անվավեր է համարում:
***
ՀՀ Նախագահ Սերժ Սարգսյանն այսօր ստորագրել է Ազգային ժողովի ընդունած «Պետական պաշտոններ զբաղեցրած անձանց սոցիալական երաշխիքների մասին» ՀՀ օրենքում լրացում կատարելու մասին օրենքը:
ՀՀ Նախագահն ստորագրել է նաև «Իրավական ակտերի մասին» ՀՀ օրենքում փոփոխություններ և լրացումներ կատարելու մասին, «Մարդու իրավունքների պաշտպանի մասին» ՀՀ օրենքում փոփոխություն կատարելու մասին, «Արդարադատության ակադեմիայի մասին» ՀՀ օրենքում փոփոխություն կատարելու մասին, «Դատական ծառայության մասին» ՀՀ օրենքում փոփոխություններ կատարելու մասին, «ՀՀ քրեական օրենսգրքում լրացում կատարելու մասին», «ՀՀ քաղաքացիական դատավարության օրենսգրքում փոփոխություններ և լրացումներ կատարելու մասին», «ՀՀ քրեական դատավարության օրենսգրքում փոփոխություններ և լրացումներ կատարելու մասին», «ՀՀ դատական օրենսգրքում փոփոխություններ և լրացումներ կատարելու մասին» ՀՀ օրենքները:
***
Հունիսի 20-ին, հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում ժամկետային զինծառայող, շարքային Գրիշա Մուրադի Խաչատրյանի (ծնվ. 1994թ., Սիսիանի զ/կ, 2013-1 զորակոչ) մահվան փաստով հարուցվել է քրեական գործ ՀՀ քրեական օրենսգրքի 104-րդ հոդվածի 1-ին մասով (Սպանությունը՝ ապօրինաբար մեկ ուրիշին դիտավորությամբ կյանքից զրկելը): Այս մասին Լուրեր.com-ի հետ զրույցում ասաց ՊՆ քննչական ծառայության հասարակայնության հետ կապերի բաժնի ավագ սպա Մերի Սարգսյանը:
Վերջինիս խոսքով' դեռևս հարուցված քրեական գործի շրջանակներում ձերբակալված չկա, կատարվում է նախաքննություն:
Հիշեցնենք, որ ստացված օպերատիվ տեղեկության համաձայն' հունիսի 20-ին, հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային գնդակային վիրավորում է ստացել ժամկետային զինծառայող, շարքային Գրիշա Մուրադի Խաչատրյանը (ծնվ. 1994թ., Սիսիանի զ/կ, 2013-1 զորակոչ): Միջադեպի մանրամասները ճշտվում են:
