Ն.Ս.Օ.Տ.Տ. Արամ Ա Կաթողիկոսն Անթիլիասի մայրավանքից ժողովրդին է փոխանցել Քրիստոսի հարության ավետիսը: Այս մասին «Արմենպրես»-ը տեղեկացավ Կիլիկիո Կաթողիկոսության պաշտոնական էջից: Իր խոսքում նա նշել է. «Աստծո որդուն գերեզման իջեցնելով՝ մարդիկ կարծել են, որ կյանքի և ճշմարտության լույսը կարելի է թողել: Քրիստոսն իր հարությամբ ցույց է տվել աշխարհին, որ չի կարելի լույսը գերեզմանել: Քրիստոնեական հասկացողությամբ լույսը հոմանիշ է ճշմարտության, հավիտենական կյանքի»:
Անդրադառնալով Քրիստոսի հարության լույսով իր կյանքը շաղախած հայ ժողովրդին՝ Վեհափառը նշել է, որ պատմության խավարի դիմաց Քրիստոսի հարության լույսով պայծառակերպեցինք մեր կյանքը: Ապա ավելացրել է, որ հարյուր տարիներ առաջ խավարային ծրագրերով լեցուն մարդիկ փորձել են հայ ժողովրդին գերեզմանել, այսօր Քրիստոսի հարության լույսով լուսավորված մեր ժողովուրդը գերեզմանից դուրս է ելել և Քրիստոսի հարությամբ տոնախմբում է իր հարությունը:
Կաթողիկոսը խոսել է նաև Միջին Արևելքի իրավիճակի մասին՝ քննադատելով փոքրամասնությունների ու հատկապես քրիստոնյա համայնքների նկատմամբ ցուցաբերած անմարդկային վերաբերմունքը ծայրահեղական խմբավորումների կողմից: Նա նաև շեշետել է Լիբանանում նախագահի շուտափույթ ընտրության անհրաժեշտությունը:
Անթիլիասի Ս. Գրիգոր Լուսավորիչ մայր տաճարում տեղի է ունեցել սուրբ Զատիկի առիթով պատարագ, որին ներկա է գտնվել մարդկանց հոծ բազմություն: Վեհափառին շնորհավորել են Լիբանանի պետական պատասխատուներ, ինչպես նաև տարբեր հոգևոր պետեր:
