Հայաստանի Հանրապետության վարչապետն ունենալու է երկու նստավայր: Այդ մասին կառավարության նիստից հետո լրագրողների հետ զրույցում նշեց ՀՀ արդարադատության նախարար Դավիթ Հարությունյանը: «Վարչապետը կառավարությունում ևս ունենալու է նստավայր, որովհետև կառավարության անդամների հետ թերևս առավել արդյունավետ աշխատանք կարող է իրականացվել այստեղ»,-ասաց նախարարը՝ հիշեցնելով, որ ևս մեկ նստավայր է նախատեսված վարչապետի համար:

«Ապագա վարչապետի հնարավորություններն այն աստիճանի են ընդլայնված, որ գործող նախագահի լիազորությունների զգալի մասն իրականացվելու է վարչապետի կողմից ու զուտ կառուցվածքային ու ենթակառուցվածքային առումով նախագահի նստավայրի շենքը հարմարեցված է մի շարք լիազորությունների պատշաճ իրականացման համար», - նշեց նա:

 

Սահմանադրական նոր կարգավորումներով, որոնք ուժի մեջ են մտնելու ապրիլի 9-ից, Հայաստանն անցում է կատարելու կառավարման խորհրդարանական համակարգի: ՀՀ ապագա վարչապետի նստավայր է լինելու Բաղրամյան 26-ը, որը այժմ ՀՀ նախագահի նստավայրն է: ՀՀ ապագա նախագահի նստավայրը լինելու է Մաշտոցի 47-ը: