Ավան և Նոր-Նորք վարչական շրջանների ընդհանուր իրավասության դատարանի դատավճռով՝ թիվ 5 երթուղային տաքսու վարորդ Արսեն Հակոբյանը մեղավոր է ճանաչվել և դատապարտվել 7 տարվա ազատազրկման: 37-ամյա Արսեն Հակոբյանը, ով եղել է թիվ 5 երթուղային տաքսու վարորդ, դատավճռի համաձայն' երթուղում սահմանված կարգով երթևեկելու հետ կապված վիճաբանել է նույն երթուղու վարորդներ' Արտակ Սաղաթելյանի և Վրեժ Պողոսյանի հետ և նրանց կողմից ծեծի ենթարկվել: Հարցերը պարզաբանելու նպատակով Ա.Հակոբյանը գործընկեր վարորդներին ժամադրել է, իսկ հանդիպման մասին նախապես տեղյակ պահել իր ընկերներ Ալեքսանյանին, Նորայր Բաղիրյանին, Վրույր Վերդյանին և Հրաչյա Հակոբյանին: Պայմանավորվածության համաձայն' Ա.Հակոբյանն իր «թիմակիցների» հետ Ավանում գործող «Սթար» սուպերմարկետի մոտ հանդիպել է Արտակ Սաղաթելյանին և Վրեժ Պողոսյանին, որտեղ վերջինս փորձել է հաստատել իրենց դիրքը երթուղում, ինչը չի ընդունել Ա.Հակոբյանը և հենց վերջինս էլ հարցի հետ անհամաձայնությունը փորձել է լուծել բռունցքներով: Օգտվելով հարմար առիթից՝ բռունցքով 1 անգամ հարվածել է Վ.Պողոսյանի դեմքին՝ պատճառելով գանգուղեղային փակ, բութ վնասվածքի, գանգի հիմի ոսկրերի փակ կոտրվածքի ձևով, կյանքին վտանգ սպառնացող վնաս, որն էլ հանգեցնել է գլխուղեղի կենսական կարևորագույն ֆունկցիաների սուր խանգարման՝ անզգուշությամբ առաջացնելով Վրեժ Պողոսյանի մահը: Դատարանը Արսեն Հակոբյանի անձը դրականորեն բնութագրող հանգամանքներն է ճանաչել, առաջադրված մեղադրանքն ընդունելը, ՀՀ ոստիկանություն ինքնակամ ներկայանալը, խոստովանական ցուցմունքներ տալը, կատարածի համար զղջալը, ինչպես նաև' տուժողի իրավահաջորդին պատճառված վնասի փոխհատուցելուն ուղղված գործողություններ կատարելը: Ա. Հակոբյանի քրեական պատասխանատվությունն ու պատիժը մեղմացնող հանգամանքներ են դիտվել նաև խնամքի տակ մինչև տասնչորս տարեկան 2 երեխայի առկայությունը: Ի դեպ, դատարանն առանց քննության է թողել տուժողի իրավահաջորդ Մելանյա Պողոսյանի քաղաքացիական հայցը' ամբաստանյալ Արսեն Հակոբյանից 5 500 ԱՄՆ դոլարին համարժեք 2 300 000 ՀՀ դրամ բռնագանձելու պահանջի մասին: Իսկ Արսեն Հակոբյանի նկատմամբ նշանակել է բժշկական բնույթի հարկադրանքի միջոց' արտահիվանդանոցային հսկողություն և հարկադիր բուժում հոգեբույժի մոտ:
