ԱՄՆ Սենատի արտաքին հարաբերությունների հանձնաժողովի կողմից Հայոց ցեղասպանությունը ճանաչող բանաձևի ընդունումը նախազգուշացում էր Թուրքիայի համար: Ինչպես հաղորդում է թուրքական Haberler.com-ը, այս մասին հայտարարություն է արել Թուրքիայի ընդդիմադիր Հանրապետական ժողովրդական կուսակցության փոխնախագահ Ֆարուք Լողօղլուն: «Մինչ այժմ արած հայտարարությունները վկայում են այն մասին, որ իշխող «Արդարություն և զարգացում» կուսակցությունը լրջությամբ չի մոտենում խնդրին: Երևում է, որ իշխանությունները 2015 թվականին մոտենալու են առանց նախապատրաստությունների»,- ասել է Լողօղլուն: Իր կուսակցության անունից նա կոչ է արել Հայոց ցեղասպանության հարյուրերորդ տարելիցին ընդառաջ լայնածավալ և մանրամասն ռազմավարություն մշակել: