«Մատչելի բնակարան երիտասարդ մասնագետներին» բնակարանային ապահովության սոցիալական ծրագրի շրջանակում Երևան քաղաքի Ծարավ Աղբյուրի 55/17 և 55/20 հասցեներում կառուցված բազմաբնակարան բնակելի համալիրի դիմաց կոյուղաջրերից ճահիճ է գոյացել: Այս մասին ահազանգել են նշված հասցեում ապրող մի խումբ բնակիչներ: 2016 թվականի հունիսին շահագործման հանձնված «Ավան 4» բազմաբնակարանային համալիրի, որի մեջ մտնում են Ծարավ Աղբյուրի 55/17 և 55/20 շենքերը, դիմաց գտնվող սեփական տան կոյուղաջրերը, չունենալով հեռացման ցանց, լցվում են կես մետր խորությամբ փորվածքի մեջ:

55/17 շենքի չորրորդ մուտքի բնակիչ Արսեն Մանուկյանի խոսքով' բնակիչները խնդրի մասին բազմիցս տեղեկացրել են և´ քաղաքապետարան,և´ թաղապետարան, սակայն ոչ մի արդյունք չի եղել: «Բազմիցս դիմել ենք քաղաքապետարան թե´ թեժ գծերով, թե´ գրավոր դիմումներով, սակայն ոչ քաղաքապետարանի, ոչ էլ թաղապետարանի կողմից ոչ մի գործնական քայլ չի արվել: Նույնիսկ չեն պատկերացրել, թե ինչ խնդիր է: Թեժ գծով զանգել տեղյակ ենք պահել, հարցրել են' ձեր մուտքի մոտ ջո՞ւր է լցվում, վնասվել է կոյուղագի՞ծը»,-ասում է Արսեն Մանուկյանը:

Կոյուղաջրի հեռացման ցանց չունեցող սեփական տան բնակիչ Վահան Սարգսյանը ստեղծված իրավիճակի մեղավոր է համարում «Ավան 4»-ի կառուցապատողին' «ԷյԴիԷյԹեք» ՍՊԸ-ին: «Նախքան դիմացի շենքերը կառուցելն, այստեղ փոս կար փորած, որի մեջ էին լցվում կոյուղաջրերը: Երբ շինարարությունը սկսեցին, տեխնիկայով ամբողջ տարածքը հարթեցրին ու այ էս վիճակը ստեղծվեց: Մինչ այդ կոյուղաջրերը հողի մակերես դուրս չէին գալիս»,-վստահեցնում է Վահան Սարգսյանը և հավելում, որ սեփական միջոցներով կոյուղագիծ անցկացնելու հնարավորություն չունի. «Ես էս շենքերի «պրարաբին»' Վահրամին, ասել եմ' ո՞նց պետք է լինի, ինքն էլ ասել էր' «դու գործ չունես, դա մեր խնդիրն է, մենք էլ կլուծենք», դե թող գան ու լուծեն»:

Թե կողմերից ով է մեղավոր ստեղծված իրավիճակի համար' կառուցապատողը, քաղաքապետարանը, թե սեփական տան տերը, Ծարավ Աղբյուրի 55/17-ի շենքի բնակիչների համար կարևոր չէ, կարևորն այն է, որ խնդրին անհապաղ լուծում տրվի: «Իրականում սանիտարահիգիենիկ լուրջ խնդիր կա: Եղանակի տաքացմանը զուգահեռ գարշահոտությունը տարածվել է բակով մեկ: Չի բացառվում, որ եթե շարունակվի այսպես մնալ, արդեն զանգեր կլինեն 911-ին, քանի որ սա համաճարակի բույն է»,-մտագոհված է անմիջապես գարշալճի դիմաց գտնվող' չորրորդ մուտքի մեկ այլ բնակիչ՝ քաղաքագետ Հրանտ Մելիք-Շահնազարյանը:

Բնակիչների պատմելով' խնդիրն ի հայտ է եկել դեռևս 2016թ.ձմռանը: Ցածր ջերմաստիճանային պայմաններում, հողը չկարողանալով գոնե որոշ չափով ներծծել կոյուղաջուրը, դուրս էր հորդել և բավականին հաստ սառույցի շերտ գոյացրել: «Ընդհուպ մինչև չորրորդ մուտքի աստիճանների մոտ կոյուղաջրերից' առանց չափազանցության մոտավորապես 40 սմ հաստությամբ սառցաշերտ էր գոյացել, որն ահավոր դժվարացնում էր ավտոմեքենաների տեղաշարժը: Այդ ժամանակ տեղեկացրել էինք թաղապետարան, որ գան գոնե սառույցը մաքրեն: Այնտեղից ուղարկված տեխնիկան մոտ 4 ժամ աշխատել է, մինչև մի փոքր մակերես ազատել է սառցաշերտից»,-ասում է Արսեն Մանուկյանը և ցույց տալիս նոր փռած ասֆալտի վրա առաջացած փոսերը. «Սրանք այդ սառցադաշտը քանդելու ժամանակ են առաջացել»:

Վահան Սարգսյանը չի ժխտում հարևանի ասածները: Անհարմար է զգում ստեղծված իրավիճակի համար, բայց մեղավոր' ոչ:
Քանի դեռ սեփական տան տերը մեղադրում է կառուցապատողին, վերջիննէլ, Արսեն Մանուկյանի խոսքով, մի կողմ քաշվում' պատճառաբանելով, թե խնդիրը շենքի շահագործումից հետո է առաջացել, հետևաբար իրենց լուծելի խնդիրը չէ, գարշահոտությունը շարունակում է «բուրել» Ծարավ Աղբյուրի 55/17 և 55/20 շենքերի բակում:

Հիշեցնենք, որ «Ավան 4» բազմաբնակարան համալիրը «ԵՊՀ շրջանավարտների միավորում» ՀԿ-ի ջանքերով և ՀՀ նախագահի բարձր հովանու ներքո իրականացվող' «Մատչելի բնակարան երիտասարդ մասնագետներին» ծրագրի մի մասն է:

Աղբյուրը՝ times.am