Եթե Եվրամիություն մտնելու համար երկրները հերթ են կանգնած, ապա Մաքսային միությունում ես չեմ տեսնում ոչ մի հերթ, չեմ տեսնում, որ ինչ-որ մեկը կանգնի ու խնդրի՝ ընդունեք մեզ: Այս մասին այսօր հայտարարել է Ուկրաինայի իշխող Ռեգիոնների կուսակցության ներկայացուցիչը:
Մարտի 12-ին ԱՊՀ տարածքում ինտեգրացիայի հարցը քննարկելու են Սերժ Սարգսյանն ու Վլադիմիր Պուտինը: Հայաստանը նույնպես կանգնած չէ Եվրասիական միության հերթում, իսկ դա նշանակում է, որ նրան այնտեղ են փորձում քաշել ուժով, շանտաժով կամ էլ շատ ուժեղ փաստարկներով:
Ինչո՞վ կարող է Ռուսաստանը գայթակղել Հայաստանին եւ ստիպել մտնել Եվրասիական կամ էլ Մաքսային միություն: Միանգամից մի քանի «մտրակ ու կարկանդակ» է նշվում, այդ թվում՝ գազի գինը չբարձրացնելը, դեսանտ իջեցնելը Ստեփանակերտի օդանավակայանում որպես «թռիչքների անվտանգության երաշխավոր», եւ կարող է անգամ ճանաչել Ղարաբաղի անկախությունը:
Հատկանշական է, որ մարտի 12-ին Մոսկվայում է լինելու նաեւ Աբխազիայի նախագահ Անկվաբը, եւ լիովին հավանական է, որ Վլադիմիր Պուտինը կհայտարարի Ղարաբաղի «միջանկյալ» ճանաչման մասին, ինչպես հայտարարել է Աբխազիայի ու Հարավային Օսիայի դեպքում: Այդ քայլը հավանական է թվում վերջին շրջանում ռուսական լրատվամիջոցներում Ղարաբաղի թեմայով հայտնվող նյութերի լույսի ներքո: Այդ նյութերի կապակցությամբ Ադրբեջանի ԱԳՆ-ը վերջին ամիսների ընթացքում 3 նոտա է ուղարկել Ռուսաստանի դեսպանատուն: Չնայած նրան, որ ՌԻԱ Նովոստիից հանվել է «ղարաբաղամետ» հոդվածը, «Էխո Մոսկվին» հարցազրույց է արել ԼՂՀ ԱԳ նախարար Կարեն Միրզոյանի հետ՝ կայքում տեղադրելով Ղարաբաղի դրոշը:
Շուտով Հայաստան կժամանեն ԵԱՀԿ Մինսկի խմբի համանախագահները, ովքեր ղարաբաղյան հակամարտության կարգավորման վերաբերյալ որոշակի հարցեր կքննարկեն: Ըստ ամենայնի, ԱՄՆ, ԵՄ ու Ռուսաստանի միջեւ որոշակի պայմանավորվածություն է ձեռք բերվել ԼՂՀ ճանաչման վերաբերյալ: Հնարավոր է, Ռուսաստանին է տրվել Ստեփանակերտի օդանավակայանի անվտանգությունն ապահովելու իրավունքը: Սակայն Ղարաբաղում ռուսական դեսանտի ներկայությունը նշանակելու է Ղարաբաղի «միջանկյալ» ճանաչում:
Այնպես որ, Ռուսաստանը կարող է առաջ անցնել ու առաջինն անել դա՝ «վճարելով» Հայաստանին Մաքսային միություն մտնելու դիմաց: Ամեն դեպքում, Հայաստանին ԱՊՀ տարածքում ինտեգրելու համար Պուտինին ուժեղ փաստարկներ են պետք:
