«Ժողովրդավարական հայրենիք» կուսակցությունն իրականում այլ պատճառով չի մասնակցել ՀԱԿ-ի վերջերս տեղի ունեցած քաղխորհրդի նիստին: Կուսակցության ղեկավար Պետրոս Մակեյանը համոզված է, որ ՀԱԿ-ը նոր գործողությունների ծրագրով եւ նոր ղեկավարներով դեռ ի վիճակի է կազմաքանդելու «ավազակապետական բուրգը»: Նրա կարծիքով՝ՀԱԿ-ի հիմնական սխալների պատճառը ոչ կոլեգիալ որոշումներն էին եւ մի քանի անձինք, ովքեր հիմա արշավ են սկսել Պ. Մակեյանի դեմ՝տարրալուծելով եւ խռովություններ առաջացնելով նաեւ Մակեյանի ղեկավարած կուսակցությունում: Իսկ իրավիճակի հիմնական մեղավորը, ըստ նրա, Լեւոն Տեր-Պետրոսյանն է:

Պ. Մակեյանի բացահայտումները՝galatv.am-ի թղթակցի հետ զրույցում:

-Պարոն Մակեյան, ո՞րն էր իրական պատճառը, որ Դուք չէիք մասնակցում ՀԱԿ քաղխորհրդի վերջին նիստին:

-Իրական պատճառը այն է, որ այսօր այս պահի դրությամբ Կոնգրեսը քաղաքական գործընթացներից դուրս է մնացել եւ բովանդակային որեէ լուրջ հարց չէր կարող քննարկվել, տեխնիկական խնդիրներ էլ կար, դրա համար չմասնակցեցինք: Հիմա մենք մինչեւ մեր կուսակցության մշակած փաթեթը գործընկեր կուսակցություններին չներկայացնենք, անիմաստ է որեւէ ժամավճարությամբ զբաղվել, որովհետեւ իրականում քաղաքական որեւէ խնդիր այնտեղ չի կարող քննարկվել՝ այն պարզ պատճառով, որ Կոնգրեսը քաղաքական գործընթացներից դուրս է մնացել:

-Դուք քաղխորհրդի նիստին պիտի ներկայացնեիք Ձեր կուսակցության մշակած գործողությունների փաթեթը, ինչո՞ւ չներկայացրիք…

-Մենք որոշել ենք նախ առանձին-առանձին ներկայացնել եւ քննարկել Կոնգրեսին մաս կազմող կուսակցությունների հետ եւ նոր միայն ներկայացնել ընդհանրական քննարկման քաղխորհրդում:

-Կոնգրեսի մաս կազմող հատկապես ո՞ր կուսակցությունների, ո՞ր գործիչների հետ եք պատրաստվում քննարկել Ձեր կուսակցության մշակած հետագա գործողությունների փաթեթը:

-Բոլոր այն կուսակցությունները, որոնք այսօրվա դրությամբ դեռ մնում են ՀԱԿ-ի կազմում: Նիկոլի հետ դեռ չեմ հանդիպել, բայց հանդիպելու եմ: Նիկոլի հետ անձամբ տրամադրված եմ որոշ հարցեր քննարկելու:

-Կադրային հարցեր կա՞ն փաթեթում, հատկապես ո՞ր կադրերի հարցերն եք քննարկելու:

-Փաթեթը հիմնականում համակարգային է, բնականաբար ներառում է նաեւ առանձին մարդկանց, որոնք ավելի պատասխանատվություն են կրում ստեղծված իրավիճակի համար: Էդ մարդկանց ցուցակն էլ կքննարկվի կուսակցությունների հետ հանդիպումների ընթացքում:Երբ որ Կոնգրեսի կառավարման համակարգը բովանդակություն չունի, էդ է հիմնական խնդիրը: Անձերը այնտեղ այքան էլ էական չեն, քանի որ նրանք կատարում են հստակ հրահանգներ, ոչ թե քաղաքական որոշումներ:

-Եվ ու՞մ հրահանգներն են կատարում այդ դեպքում:

-Մինչեւ դեկտեմբերի 25-ը, միգուցե իմ սուբյեկտիվ կարծիքն է, կատարում էին Լեւոն Տեր-Պետրոսյանի հրահանգները, բայց դրանից հետո չգիտեմ…

-Պարո՛ն Մակեյան, տեղեկություններ են շրջանառվում, որ նաեւ Դուք խնդիրներ ունեք Ձեր սեփական «Ժողովրդավարական հայրենիք» կուսակցության ներսում, դա այդպե՞ս է:

-Վերջին երկու շաբաթում՝դեկտեմբերի 26-ից սկսած, խնդիրը ջրի երես դուրս եկավ: Քանի որ մեր կուսակցության քաղխորհուրդը մի բան է որոշում, հետո կուսակցության նախագահի տեղակալը անտեսում է քաղխորհրդի որոշումը եւ անձնական որոշում է կատարում եւ արհամարհում է մեկ օր առաջ ընդունված մեր կուսակցության քաղխորհրդի որոշումը: Ես սկզբում մտածեցի, որ թյուրիմացություն է, բայց հետո պարզվեց, որ թյուրիմացություն չկա, եւ ամենը ուղղորդվում է Զուրաբյան Լեւոնի կողմից: Խնդիրներ, այո՛, կան, բայց ինչ ձեւով որ ներկայացվում են Զուրաբյանի կողմից ուղորդվող լրատվամիջոցների կողմից իրականությանը չի համապատասխանում:

-Ի՞նչ եք մտածում, ինչպե՞ս պետք է ՀԱԿ-ը գործի այսուհետ:

-Գիտեք՝ ժամանակին Լեւոն Տեր-Պետրոսյանն ասաց՝իրեն օգտագործեն գործիք, ավազակապետական բուգը կազմաքանդելու համար:Բայց ժամանակի ընթացքում հասկացանք, որ չստացվեց: Լեւոն Տեր-Պետրոսյանը գոնե իմ տպավորությամբ այդպես է, հայտարարեց, որ քաղաքականությունից դուրս է գալիս: Բայց հիմա երկիրը հո չի՞ մնալու հավերժ ավազակապետական բուրգի իշխանության տակ: Եթե Լեւոն Տեր-Պետրոսյանը կամենա աջակցել, օգնել իհարկե, դա մեծ ներդրում կլինի :

-Իսկ եթե, այնուամենայնիվ, Լեւոն Տեր-Պետրոսյանը չուզենա՞, ովքե՞ր են կազմաքանդելու Ձեր ասած ավազակապետությունը:

-Հակ-ում կան բազմաթիվ գործիչներ, որ կկարողանան գործընթացը տանել: Կարծում եմ՝ ժամանակն է, եւ դեռեւս մայիսին մեր կուսակցությունը հայտարարությամբ հանդես եկավ, որ պետք է ձեւավորել նոր ուժային կենտրոն: Այնպես որ, պարադիր չէ միայն ՀԱԿ-ում տեսնել կազմաքանդող ուժերին:

-Արդյո՞ք Դուք խոսում եք ԲՀԿ-ի մասին:

-Ես տարուց ավել անընդհատ ասել եմ, որ նոր Արթուր Բաղդասարյան է ձեւավորված ի դեմս ԲՀԿ-ի, որ օգտագործվում է իշխանության կողմից…Այսինքն էն սխալները, որ այսօր ֆիքսել են ե՛ւ Սասունը, ե՛ւ Նիկոլը տտ շարունակ կրկնվել է իմ կողմից: Ես հրապարակային էլ եմ արտահայտվել, բայց եթե հիշում եք Լեւոն Տեր Պետրոսյանը հրապարակում մեզ անվանեց խառնակիչներ: Դա նաեւ ինձ էր ուղղված, որ ես խոչընդոտում եմ սկսված գործընթացին:

Բայց ամբողջ խնդիրն ավելի շատ կառավարման համակարգի մեջ է, այսինքն՝եթե Կոնգրեսը քաղաքական որոշումներ ընդուներ կոլեգիալ առումով, գուցե ՀԱԿ-ը այդ ճանապարհը չընտրեր: Հիշում եք՝Լեւոն Տեր -Պետրոսյանը իր քաղաքական վերլուծությունում հայտարարեց, որ կոնսեսուս չկա, բայց էդ գիծը դարձավ հիմնական գիծը, Կոնգրեսի վերկորը: Այլապես նման որոշումներ չէր ընդունվի եւ ՀԱԿ-ը այս վիճակում չէր հայտնվի:

-Ովքե՞ր էին հիմնական որոշում կայացնողները, կամ ու՞մ մեղքով է ՀԱԿ-ը այսօր հայտնվել Ձեր մատնանշած՝ վատ վիճակում:

-Առաջին հերթին ես ինձ եմ մեղավոր ճանաչում, որովհետեւ երեւի մեծ դիմադրություն ցույց չեմ տվել, քիչ եմ ըմբոսոտացել եւ համակերպվել եմ: Իսկ երկրորդ մեղավորը ես կարծում եմ մնացած քաղաքական դեմքերը, իսկ ամենամեծ մեղավորը ես տեսնում եմ առաջնորդին, որ ինքն է նախընտրել որոշումների կայացման այդ մոդելը: Ինքը որոշում էր, կիսվում էր Կոնգրեսի նոմենկլատուրայի հետ, որոնք իրականում քաղաքական ուժեր չէին ներկայացնում, նշանակված մարդիկ էին: Եվ էդ մոտեցումները բերեց հասցրեց այս հանգրվանին:

Այնուամենայնիվ, մենք փորձելու ենք, ՀԱԿ-ում առկա ներուժը օգտագործելով, երկրում ստեղծված սահմանադարական կարգը վերականգնել: Հիմա, ինչպես տեսնում եք, մեր առաջարկած փաստաթղթի մասին դեռ ոչինչ հայտնի չէ, բայց հարձակումները Զուրաբյանի կողմից եւ նրա կազմակերպած ինտրիգները, խարդավանքները եւ իր տիկնոջ թերթով իմ եւ «Ժողովրդավարական հայրենիքի» վրա գնում է բազմաշերտ հարձակումներ, նույնիսկ բաներ են կպցնում, որ որեւէ ձեվով չես կարող կպցնել ո՛չ Մակեյանին, ո՛չ էլ «Ժողովրդավարական հայրենիքին»:

-Ի՞նչ տպավորություն ստացաք ՀԱԿ առաջնորդի վերջին հարցազրույցից, ի՞նչ էր նա կամենում ասել:

-Նախ՝ այդ հարցազրույցով նա փորձեց կանխել անդաստիարակ ջահելներին ու կոնգրեսականների այն շերտին, որ ասես անմիջապես մի բան՝ ու սկսում են դավաճանի պիտակավորումը նախաձեռնել:Ով մի բան ասում է, անմիջապես գնում է այդ գործընթացը: Նա կամեցավ կանխել՝էդ մեկ եւ երկրորդը՝նորից մեսիջներ տվեց, որ դեռ մնում է առաջնորդ եւ երրորդ՝ նրա հեգնանքը՝ցավով եմ ասում՝հեգնանքը, որ եթե գործ անող եք, ուրեմն արեք, հերիք է խոսեք…Էս հեգնանքը…չգիտեմ, բոլոր դեպքերում իր գործընկերներն ենք եղել, հինգ տարի նաեւ սպասարկել ենք իրեն, բայց մենք հիմա ի՞նչ անենք, որ պայքարի ճանապարհը բարդ է եւ էֆեկտիվությունը պակասել է, որովհետեւ դա թելադրում է հայաստանյան իշխանությունների այն որակները, որոնք չեն հանդուրժում որեւէ այլախոհություն եւ ցավոք սրտի, հիմա նաեւ այդպես է ընդդիմության մեջ, որ չի հանդուրժվում այլախոհությունն ու այլակարծությունը:

Քրիստինա Մկրտչյան