Չնայած սպավում էր, որ ԱԺ պատվիրակության բրյուսելյան այցը պետք է ամփոփի ԱԺ նախագահ Հովիկ Աբրահամյանը, ով գլխավորել է այդ պատվիրակությունը, այնուհանդերձ ամփոփումը կատարվել է առանց նրա:
Բանն այն է, որ ամփոփիչ հայաստանյան ասուլիսը պետք է լիներ հունվարի 14-ին, սակայն այն հետաձգվել է, իսկ ՀՀԿ խմբակցության ղեկավար, պատվիրակության անդամ Գալուստ Սահակյանն էլ ասել էր yerkir.am-ին, որ մտածեցին, թե լավ կլինի այցը ամփոփի պատվիրակության ղեկավար Հովիկ Աբրահամյանը:
Սակայն, ինչպես պարզվեց հունվարի 16-ին նշանակված ամփոփումից, այցի մասին ոչ թե Հովիկ Աբրահամյանն է պատմել, այլ պատվիրակության կազմում Բրյուսել մեկնած ՀՀԿ-ականներ՝ ԱԺ արտաքին հարաբերությունների հանձնաժողովի նախագահ Արտակ Զաքարյանը եւ ԱԺ պաշտպանության, անվտանգության եւ ներքին գործերի հանձնաժողովի նախագահ Կորյուն Նահապետյանը:
Երբ լրագրողները փորձել են պարզել, թե ինչու չի ամփոփում Հովիկ Աբրահամյանը, բանախոսները պատասխանել են, որ ունեն բրյուսելյան այցն ամփոփելու բոլոր լիազորությունները, հայտնում է yerkir.am-ը:
Ըստ ամենայնի, Հովիկ Աբրահամյանի համար բրյուսելյան այցն իսկապես անցել է բավական անմխիթար եւ անհեռանկար բովանդակությամբ, եւ Ազգային Ժողովի նախագահը պարզապես ամփոփելու տրամադրություն չունի: Բրյուսելից հետո նա երեւի թե ավելի շատ ունի սփոփվելու, քան այցն ամփոփելու ցանկություն:
